A nova Comisión Executiva Provincial do PSdeG-PSOE da Coruña celebrou este venres a súa primeira reunión en Culleredo, nun encontro centrado en definir o programa de traballo das distintas áreas e en establecer o calendario de renovación das executivas locais, que se completará antes do 15 de xuño.
Segundo indicaron os socialistas nunha nota de prensa, cada agrupación deberá convocar asembleas extraordinarias cun mínimo de cinco días de antelación. As candidaturas terán que presentarse en listas pechadas e paritarias, conforme á normativa interna do partido. Esta renovación estrutural forma parte dunha estratexia que busca reforzar a organización nos concellos da provincia.
Tamén se detallaron os criterios para a elección de representantes nos comités nacional e provincial. Estableceuse que o proceso se realizará mediante voto maioritario en listas completas, con tantas persoas como lle correspondan a cada agrupación, e coa posibilidade de incorporar ata tres suplentes por candidatura.
Ademais, as listas que superen o 20% dos votos válidos nas agrupacións que elixan tres ou máis representantes poderán acceder tamén á representación. A dirección provincial concretou que a renovación das Coordinadoras Comarcais está prevista para rematar o 29 de xuño de 2025, completando así o proceso de reorganización interna.
O secretario xeral provincial Bernardo Fernández Piñeiro, que foi reelixido recentemente para o cargo, salientou durante o encontro a importancia de reforzar o papel das agrupacións locais no novo ciclo político. “As agrupacións locais son a base do Partido Socialista e son fundamentais de face aos retos que están por diante”, afirmou.
Nesa mesma liña, destacou que “agora toca escoitar á militancia de base para continuar reforzando o partido en todos os concellos da provincia, porque o municipalismo é o gran músculo do PSdeG”.
