A Garda Civil, nunha operación internacional en colaboración con Europol e a policía finlandesa, logrou recuperar un reloxo de alta gama valorado en 12.000 euros que fora roubado en 2020 na localidade coruñesa de Oleiros.

En concreto, foi localizado nunha xoiaría de Helsinqui cinco anos despois de ser roubado. Os feitos tiveron lugar en febreiro de 2020, na zona de Santa Cruz de Oleiros, cando unha moza se achegou á vítima coa aparente intención de saudala. Nese momento, aproveitou para subtraerlle o reloxo sen que a afectada se decatase.

A investigación permitiu un mes despois identificar á presunta autora dos feitos, unha muller de orixe caucásico. A colaboración da Benemérita e Europol permitiu seguir a pista do reloxo ata localizalo en Helsinqui. Agora, cinco anos despois, as autoridades finlandesas, tras recibir a información facilitada, procederon a intervir a peza e abrir dilixencias en relación cun posible delito de receptación.