O exdirector dos Museos Científicos coruñeses e impulsor da súa creación, Ramón Núñez Centella, foi nomeado este luns fillo predilecto da Coruña, nun acto celebrado no salón de sesións do Palacio Municipal de María Pita e presidido pola alcaldesa, Inés Rei.

Na cerimonia, estiveron presentes membros da corporación municipal, representantes políticos do período no que Núñez Centella exerceu como director dos Museos Científicos e familiares e amigos do homenaxeado.

“Moncho Núñez é considerado por moitos como un dos pais da museoloxía científica en España, Europa e boa parte do mundo”, sinalou a alcaldesa durante a súa intervención.

O nomeamento de Ramón Núñez como fillo predilecto da cidade prodúcese cando se conmemorou, o domingo 1 de xuño, o 40 aniversario da Casa das Ciencias, un acto no que tomou parte o propio Núñez Centella.