Unha persoa faleceu e outras dúas resultaron feridas nunha colisión no municipio coruñés de Oza-Cesuras, na AC-230. Segundo informou o 112, o choque foi entre dous turismos, de forma lateral. Foi un dos implicados na colisión quen alertou ao servizo, pouco despois das 15.00 horas. Advertía de que se trataba dunha situación grave. Ademais, como consecuencia do impacto, a única vítima mortal do accidente quedou atrapada no interior do vehículo, polo que foi necesaria a intervención dos equipos de excarceración do Parque Comarcal de Bombeiros de Betanzos e do GES de Curtis.

Pola súa banda, os profesionais de Urxencias Sanitarias de Galicia-061 organizaron a resposta asistencial en función dunha dotación a bordo do helicóptero medicalizado con base en Ourense, que se ocupou do traslado dun dos feridos, o máis grave. Dos dous vehículos afectados, nun viaxaban dúas persoas e outra no outro. Precisamente, a persoa que circulaba soa resultou falecida. Ao lugar dos feitos desprazáronse Urxencias Sanitarias de Galicia-061, os Bombeiros de Betanzos, o GES de Curtis, a Garda Civil de Tráfico e mantemento de estradas.