A alcaldesa da Coruña, Inés Rey, cualificou de “lamentable” e dunha “irresponsabilidade” co medio ambiente as 44 toneladas de lixo recollidas nas praias coruñesas tras a celebración do San Xoán. “Tomaremos medidas”, dixo na rolda de prensa que ofreceu este luns e na que asegurou que se estudarán á espera de concretar cales serán de cara a lograr unha maior concienciación e implicación a este respecto. Fíxoo nunha comparecencia na que felicitou aos equipos de emerxencia polo seu traballo tras unha noite cunha cifra de 190.000 persoas, unha asistencia “sen precedentes”, apuntou.

INCIDENCIAS

En total, producíronse 152 asistencias, 30 menos que o ano pasado, algo que destacou. “A única nota negativa é a do lixo”, asegurou a pesar de ser 13 toneladas menos que en 2024. Por iso, apelou a unha reflexión como sociedade ante un comportamento “incívico” e tamén “repensar as medidas a tomar”. “Hai moitos colectores, moita normativa, pedimos que se recolla, pero a cantidade de lixo que queda é unha imaxe vergoñenta”, recalcou. “Non é tan difícil recoller o que se ensucia”, insistiu a rexedora para quen é “lamentable” a imaxe das praias ao día seguinte da celebración. “É unha irresponsabilidade co medioambiente, tomaremos medidas, non casa coa cidade que queremos, sustentable”, insistiu.