A CRMH da Coruña acaba de presentar escritos diante da Dirección Xeral de Promoción da Memoria Democrática para que cumpra os prazos legais establecidos e declare xa o Pazo de Meirás como Lugar de Memoria Democrática. Desde a Comisión destacan que presentaron “o pasado 15 de xullo de 2024 un escrito de solicitude de incoación do procedemento establecido, diante da Dirección Xeral competente, para a declaración do Pazo de Meirás como Lugar de Memoria Democrática, de acordo co establecido na Lei de Memoria Democrática no súa Sección 4º.”
A solicitude realizouse pola CRMH como promotora e difusora da memoria democrática, “polo que debe ser tramitada segundo o disposto no artigo 50.1 da citada Lei, que establece un prazo de 12 meses para a incoación, e no seu caso, para a declaración do Pazo de Meirás como Lugar de Memoria Democrática”
A CRMH da Coruña tamén solicitou diante desta Dirección Xeral información sobre o estado da tramitación do procedemento. En concreto, resaltan no comunicado, establécese que “o expediente resolverase e notificarase no prazo máximo de doce meses desde a data da súa incoación, ou desde a data en que a solicitude entrara no rexistro”
Por todo isto, a CRMH insta ás administracións a proporcionarlles “información ao respecto, e no seu caso, a copia dos documentos que existan no expediente de tramitación ao respecto. A CRMH da Coruña non ten constancia nin recibiu desde a presentación da solicitude (15/07/2024) información algunha sobre a realización dos informes preceptivos”
