O Concello da Coruña ultima os trámites para actuar no mercado do aluguer tras a declaración como Zona de Mercado Residencial Tensionado.

Faino despois de que este venres reunísese a Mesa de Vivenda “para compartir os avances coas entidades participantes e recoller achegas ao plan de medidas”, informa o goberno local sobre un encontro presidido polo concelleiro de Urbanismo, Rehabilitación e Vivenda, Francisco Díaz Gallego.

O encontro forma parte, sinala o consistorio, do proceso de diálogo aberto co conxunto de axentes sociais e económicos implicados, “co obxectivo de articular un plan de acción que permita aplicar medidas de contención e apoio no ámbito do aluguer”.

“O acceso á vivenda é unha das principais preocupacións da cidadanía e por iso seguimos traballando con determinación para avanzar nun marco que nos permita intervir no mercado e garantir este dereito básico”, sinalou Díaz Gallego.

A declaración como Zona de Mercado Residencial Tensionado permitirá ao Concello optar a ferramentas específicas de regulación “e facilitará a posta en marcha de políticas de vivenda adaptadas á realidade da cidade”.