A familia Franco habilitou as visitas á Casa Cornide na Coruña tras ser multados por incumprir con esta obrigación. A páxina web do inmoble permite reservar cita para iso desde o próximo 4 de agosto, sendo o luns o único día da semana que abre as súas portas ao público. Con todo, apenas quedan ocos para este mes de agosto e parece que aínda non acepta reservas para setembro, outubro…
Os Franco, propietarios dun edificio polo que o Concello da cidade herculina xa iniciou actuacións para recuperalo para o patrimonio público — como fixo no seu momento o Estado co Pazo de Meirás –, están obrigados a abrila ao público catro días ao mes despois de que fose declarado Ben de Interese Cultural (BIC).
Ao non facelo, foron sancionados pola Xunta con 3.000 euros de multa, unha decisión que a familia do ditador recorreu e que foi declarada firme. Todo iso despois de que, previamente á sanción, o Franco non atendesen aos requirimentos feitos para a apertura do inmoble.
A Casa Cornide pasou a mans desta familia tras unha poxa gañada por Pedró Barrié da Maza que cedeu na década do sesenta o edificio á esposa do ditador, Carmen Polo, aínda que antes fora patrimonio municipal e estatal.
Na actualidade, na súa web pódense xestionar visitas desde o próximo 4 de agosto, sendo o luns o único día da semana que abre as súas portas ao público. Na mesma figuran, ademais, instrucións concretas como que o aforamento está limitado a cinco persoas por día e hora. As reservas, engade, realizaranse con polo menos 24 horas de antelación do horario seleccionado durante a visita non se permitirá a captación de imaxes, vídeo ou son.
A ALCALDESA DA CORUÑA CELEBRA A APERTURA DA CASA CORNIDE
A alcaldesa da Coruña, Inés Rey, celebrou que o Franco habilitasen as visitas á Casa Cornide na Coruña a pesar dos “anos de atraso”. Fano tras ser multados con 3.000 euros por incumprir coa obrigación de abrila ao público catro días ao mes despois de que fose declarada Ben de Interese Cultural (BIC).
“Que a familia Franco cumpra coa lei paréceme algo positivo, levan bastantes anos de atraso en entender que este é un estado democrático e de dereito”, sinalou para recalcar que “todo o que se apropiaron de maneira privada durante a ditadura non lles corresponde”. “En todo caso é unha boa noticia”, apostilou.
Así mesmo, a rexedora apuntou que o Concello da cidade herculina vai seguir ” traballando para que esa casa, ademais de abrirse ao público como BIC, volva ao patrimonio dos cidadáns que é de onde nunca debeu saír”. No entanto, indicou que se trata dun “procedemento moi complicado a nivel xurídico”.
