A Coruña contará durante o mes de setembro cun programa específico de iniciación á escalada e á marcha nórdica organizado pola Agrupación de Montañeiros Independentes (OMI) e financiado polo Concello herculino.

Segundo detalla o consistorio o obxectivo é “achegar estas prácticas deportivas á veciñanza de forma accesible, segura e adaptada a todas as idades”.

A programación estruturarase por tramos de idade, con horarios adaptados e distintos espazos de desenvolvemento. Todas as actividades requiren inscrición previa.

O Concello explica que ambas as actividades ofrecen “unha oportunidade para explorar dúas disciplinas deportivas en auxe, que fomentan un estilo de vida activo, a práctica saudable de exercicio físico e o contacto co medio ambiente”. A programación, engade, busca “promover hábitos de vida saudables desde idades temperás e favorecer a socialización e o uso dos espazos públicos municipais para o desfrute colectivo”.