O embaixador de Palestina en España, Husni Abdel Wahed, asegurou este venres no municipio coruñés de Oleiros que “ninguén pode sentirse nin afastado nin alleo” ao que está a ocorrer co pobo palestino.
Así o sinalou nun acto público no Centro Cultural A Fábrica, no marco da presentación do ciclo de Cine Amal x Palestina, onde remarcou que confía en que o pobo palestino “nalgún momento gozará dos valores humanos de xustiza, liberdade, paz e vida”.
“O único que queren é demostrar que non hai outra cousa que non sexa Israel”, asegurou, á vez que lembrou que, “durante moito tempo”, en Palestina o exército israelí “arrincaba, tallaba e queimaba” os oliveirais, esas árbores que simbolizan a historia produtiva do pobo palestino.
“Curiosamente, no mesmo lugar onde tallaban e queimaban os oliveirais, plantaban novas oliveiras. Cal é a mensaxe? Que todo o anterior non conta, que todo comeza con Israel”, esgrimiu o embaixador de Palestina en España.
A continuación, lamentou que “todos os centros culturais” da Franxa de Gaza “foron destruídos”, “todas as bibliotecas e as universidades”.
Con iso, o que busca o exercito israelí é “sumir na ignorancia” á poboación, porque así “non poderán afrontar á ocupación” xa que a preocupación sería “conseguir un prato de comida”.
“Na franxa de Gaza úsase a fame como arma de guerra e aqueles famentos cando van buscar un prato de comida son asasinados. Mentres esperan nas filas para recibir axuda, son asasinados”, subliñou.
“ACÓRDOME DOS NOSOS NENOS”
Tamén explicou que durante esta xornada realizou un percorrido polo municipio e viu aos nenos xogando e gozando da súa infancia nunha ambiente “realmente envexable”.
“Acórdome dos nosos nenos”, continuou, á vez que lamentou que “foron privados do seu dereito á educación, á infancia e á vida”.
“Aínda hai quen entra en polémicas e debates se o que ocorre en Palestina é unha masacre, un xenocidio e, a verdade, é que non importa como se faga. O importante é a sensibilidade humana”, afirmou.
“Xa se normalizou a ocupación de Palestina“, dixo, á vez que sostivo que “ninguén pode sentirse nin afastado nin alleo ao que ocorre en Palestina”.
Un ciclo de cine, un mural e unha exposición en Oleiros contra o xenocidio do pobo palestino
