UXT, CIG e CC.OO. critican a “nula” resposta mostrada pola patronal durante a negociación do convenio colectivo de transporte de viaxeiros en autobús por estrada da Coruña.

Nun comunicado, os sindicatos detallan que na última reunión da mesa negociadora, celebrada a pasada semana, a patronal “informou de que a súa única pretensión é tratar unha subida mínima do incremento salarial, totalmente desproporcionada á realidade social das persoas traballadoras, que ven incrementados os custos da vida diaria, e que actualmente se rexen por un convenio obsoleto moi afastado da realidade actual”. Critican que pretenden “non tocar” o resto do convenio.

Destacan que o anterior convenio colectivo de transporte de viaxeiros en autobús por estrada da Coruña finalizou o 31 de decembro de 2020.

As negociacións deste convenio retomáronse cunha toma de contacto en 2022 e outra en 2023 “sen intencionalidade por parte da patronal de chegar a ningún tipo de acordo”.

En 2025, volveuse a retomar a negociación “tras moita insistencia por parte da representación das persoas traballadoras do sector”. Van tres reunións “nas que non houbo un avance mínimo”.

O tres centrais sindicais consideran que a negociación ten que ir encamiñada á mellora salarial, regular a xornada laboral e mellorar dereitos sociais.