Unha muller tivo que ser trasladada a un centro hospitalario tras un incendio nunha vivenda na travesía de Meicente, no municipio coruñés de Arteixo.

O suceso produciuse sobre as 11:00 horas deste luns e foi un particular quen deu a voz de alarma, detallando que ardía a cociña dos veciños e que podería haber persoas afectadas.

A central de emerxencias 112 Galicia mobilizou de inmediato o Servizo de Urxencias Sanitarias de Galicia-061, os Bombeiros de Arteixo, a Policía Local e o Servizo Municipal de Protección Civil de Arteixo. Tras extinguir o lume, os bombeiros indicaron que ardeu a campá extractora e os mobles que había nas proximidades. Os profesionais sanitarios atenderon a dúas persoas no lugar e unha delas tivo que ser trasladada ao Hospital Universitario da Coruña (CHUAC).