Dúas persoas tiveron que ser trasladadas ao centro hospitalario de referencia tras un dobre accidente na AP-9, ao seu paso polo Burgo, en Culleredo.

Segundo a información do 112 Galicia, o primeiro sinistro produciuse sobre as 16.30 horas deste martes, no quilómetro 7 da devandita vía, e foi a Garda Civil a que alertou dun accidente.

Ata o punto desprazáronse os profesionais de Urxencias Sanitarias de Galicia-061 que prestaron asistencia a unha persoa que estaba ferida.

Este suceso xerou retencións no punto e, como consecuencia, produciuse unha segunda colisión entre dous turismos, da que resultou ferida unha persoa que se atopaba fóra do vehículo e foi arroiada.

Desta forma, os profesionais sanitarios trasladaron en ambulancia a dúas persoas feridas.