O colectivo de Vítimas do Franquismo da comarca da Coruña demandou ao goberno local herculino que axilice os trámites para a retirada da distinción de fillo adoptivo da cidade a Manuel Fraga, á vez que anunciaron novas iniciativas como actividades e un censo con familiares de falecidos pola represión franquista ou persoas ás que se lles incautaron bens. Así mesmo, os integrantes da plataforma tamén solicitaron que se lles retiren os recoñecementos concedidos pola Deputación da Coruña e o Concello de Betanzos durante a súa etapa como ministro da ditadura.
Así o expuxo o seu portavoz, Manuel Monge, na presentación do manifesto ‘Non queremos a Manuel Fraga como fillo adoptivo‘. No documento lémbrase que os concellos de Ferrol, Cedeira, Cambados e Cariño xa retiraron rúas e distincións a Manuel Fraga, polo que demandan o mesmo procedemento para as honras outorgadas pola institución provincial e o municipio brigantino. “Hai que retirar as distincións a persoas con cargos na ditadura, que é o caso de Fraga”, insistiu Monge, quen se remitiu no caso da cidade herculina aos acordos entre PSOE e BNG sobre o cumprimento da memoria democrática.
“En 2019 aprobouse iniciar o expediente, pedimos ao Concello que, dunha vez, aplique a lei”, insistiu o representante do colectivo para engadir que o mesmo debe facerse a nivel da provincia e en Betanzos. Por outra banda, o portavoz avanzou a presentación do manifesto o próximo día 30 de xaneiro, no Círculo de Artesáns da Coruña, ás 19:30 horas, xunto a outras actividades de divulgación. Entre os seus proxectos destaca a elaboración dun censo con familiares de vítimas do franquismo e o ofrecemento a centros educativos para dar charlas sobre esta etapa histórica.
