Todas as persoas ingresadas polo brote gastrointestinal rexistrado no IES de Elviña, na Coruña, provocado pola inxesta de tortilla, foron dadas de alta. Así o informa a Consellería de Sanidade no seu último parte, despois de que en informacións anteriores se cifrase en 68 as persoas afectadas, das cales catro requiriron hospitalización.
A Consellería de Sanidade tivo constancia do suceso o pasado luns e sinalou que a intoxicación debeuse a algún produto inxerido entre o 8 e o 9 de xaneiro durante o recreo. É nese momento cando os alumnos teñen acceso á cafetaría do centro, que non dispón de servizo de comedor. Malia que o establecemento presentaba boas condicións hixiénicas, a cafetaría permaneceu pechada desde que se tivo coñecemento do brote.
