O portavoz do grupo municipal do PP no Concello da Coruña, Miguel Lorenzo, reprochou á alcaldesa herculina, a socialista Inés Rey, unha falta de esixencia ante o Goberno central en relación ás cuestións que, segundo dixo, necesita a cidade. “Non fai nada para non molestar a Sánchez“, asegurou nunha comparecencia ante os medios de comunicación na que aludiu a diversas problemáticas que afectan ao municipio.

Así, o líder dos populares indicou que a rexedora non fixo nada ante a falta de desenvolvemento do Plan Director de Alvedro, aprobado en 2022. Segundo criticou, nestes momentos compróbase que “non hai un euro para a necesaria ampliación do edificio ou o novo finger”, o que compromete o futuro da infraestrutura aeroportuaria.

“A inquietude é máxima pola posible perda da conexión con Londres“, indicou Lorenzo, quen tamén asegurou que os problemas que rodean aos trens na cidade son “alarmantes”. Para o portavoz do PP, estes fallos no servizo ferroviario non son feitos illados, senón consecuencia de que a alcaldesa non “aperta” ao Goberno do Estado para acabar co que cualificou como uns “malos tratos” á Coruña.