Continúan en loita os profesionais tanto da Atención Hospitalaria como os da Atención Primaria. De feito, os médicos comezarán un paro indefinido a partir deste luns 2 de marzo en todos os centros de Saúde da Atención Primaria ante a pasividade da Xunta no proceso de nogociación.
Máis de 3.000 médicos e facultativos adscritos ao Servizo Galego de Saúde están chamados a unha folga, convocada polo sindicato O’Mega, que ameaza con cancelar cada día máis de 8.000 consultas e aumentar aínda máis as listas de espera na xa moi conxestionada Atención Primaria da Comunidade Autónoma.
Así o denuncian dende o sindicato médico maioritario en Galicia, considerando que a negativa do conselleiro de Sanidade a negociar supón unha “irresponsabilidade” que prexudicará a ducias de facultativos e a miles de usuarios da Sanidade Pública galega.
O’Mega, pídelle a Antonio Gómez Caamaño, que “abandone a súa actitude prepotente e acceda a negociar cos representantes dos médicos un plan de choque para desconxestionar a Atención Primaria”.
“O conselleiro di que O´Mega non quere realmente negociar, pero o certo é que desde que tomou posesión do cargo non se sentou a negociar cos verdadeiros representantes dos médicos” , asegura o presidente do sindicato, Manuel Rodríguez, que engade que Caamaño “dialoga pero non negocia” e asegura que o conselleiro de Sanidade “sabe perfectamente cales son as verdadeiras reivindicacións dos médicos e facultativos do Servizo Galego de Saúde”.
Manuel Rodríguez afea ao conselleiro de Sanidade que reclame do Goberno central que dialogue cos sindicatos cando para evitar a convocatoria de folgas a nivel estatal pero se negue a negociar cos representantes dos médicos galegos para evitar unha folga en Galicia.
As medidas adoptadas, “máis burocracia”
O sindicato médico maioritario en Galicia considera que as solucións economicistas formuladas polo conselleiro para tratar de garantir unha lista de espera dun máximo de catro días en Atención Primaria están condenadas ao fracaso porque terán un impacto nulo ao non ser negociadas cos verdadeiros representantes dos médicos e facultativos galegos e buscar como solución á falta de médicos a contratación de extracomunitarios, unha vía que xa fracasou cando foi proposta hai meses.
O’Mega considera que a Consellería pretende solucionar o problema con máis burocracia e sobrecargando aínda máis o traballo dos facultativos cando nin sequera se plasmaron aínda as medidas pactadas cos sindicatos de clase para desmobilizar a folga de médicos do pasado mes de novembro e que os médicos xa consideraran no seu día totalmente insuficientes.
Solucións
Para desconxestionar a Atención Primaria en Galicia e evitar o colapso dos centros de saúde e os PAC (Puntos de Atención Continuada), o sindicato considera que é necesario poñer en marcha un plan de choque que reduza a sobrecarga asistencial.
Para iso, as reivindicacións dos profesionais pasan polo establecemento de axendas pechada, cun máximo de 30 pacientes por xornada laboral, e incentivar economicamente a prolongación da xornada para atender a sobre demanda.
O’Mega esixe tamén a voluntariedade do traballo dos sábados, que debería ser mellor remunerado nos Puntos de Atención Continuada, e un reaxuste das presenzas nos PACs para manter un cociente de 30 pacientes por médico.
Ademais, o sindicato reclama a equiparación salarial entre os facultativos de Atención Primaria e o fin da discriminación na retribución dos complementos a pediatras, odontólogos e farmacéuticos,
Máis novas das folgas da sanidade pública
Os médicos convocan folga indefinida dunha semana cada mes, para reclamar un estatuto propio
A Atención Primaria volve poñer en folga os Centros de Saúde o vindeiro 12 de marzo
