O Parlamento de Galicia manifestou o seu apoio institucional á creación do Centro europeo de referencia para a innovación, a gobernación e a estratexia nas políticas europeas de recursos humanos, prevención de riscos laborais, saúde laboral e novos empregos (EUHRIC) da Coruña, en concreto na Cidade das TIC.

Así se recolle nunha declaración institucional lida na sesión plenaria deste mércores, na que destacan que se trata dunha iniciativa de cooperación e proxección europea orientada á regulación, a promoción e a ordenación da innovación aplicada en RH e PRL, no marco da transformación dixital e da intelixencia artificial.

Explica que o EUHRIC concíbese como un centro de referencia e como unha plataforma aberta de colaboración entre administracións, territorio, universidades e centros de coñecemento, empresas, profesionais e axentes sociais, co obxectivo de impulsar a investigación aplicada, a formación especializada, a transferencia de coñecemento e o desenvolvemento de proxectos piloto en ámbitos como a organización do traballo, a xestión do talento, a prevención de riscos, a saúde laboral, a ergonomía e o uso responsable de tecnoloxías dixitais e de IA.

Trátase, en definitiva, “dunha fonte de talento e de vangarda”, tal e como expón a declaración institucional da Cámara galega. Ademais, engade que, a través deste enfoque, o EUHRIC aspira a contribuír a mellorar a calidade do emprego, da seguridade e da saúde no traballo, do benestar laboral e da competitividade, con especial atención á inclusión, á igualdade de oportunidades e á responsabilidade social, “cunha visión europea e conxunta”. “En coherencia con estes obxectivos”, o Parlamento de Galicia expresa a súa vontade de apoio ao proxecto mediante a aprobación desta declaración institucional.