A cidade da Coruña dará comezo este martes, 7 de abril, á VII Semana do Cinema Galego, unha iniciativa que durante catro días achegará ao público unha selección de oito películas en sesións de acceso libre. As proxeccións terán lugar no Teatro Colón e na Domus, dous dos espazos culturais de referencia da cidade.

Segundo informou o Concello, a programación reúne títulos finalistas dos Premios Mestre Mateo nas categorías de mellor longametraxe de ficción e mellor documental. Ademais das exhibicións, o ciclo contará coa presenza dos equipos das películas, que participarán en presentacións e coloquios co público asistente.

A inauguración terá lugar o martes 7 no Teatro Colón coa proxección de Sirât, dirixida por Oliver Laxe, ás 19.00 horas. A continuación, ás 21.00 horas, será a quenda de As liñas descontinuas, de Anxos Fazáns.

O mércores 8 manterase a actividade neste mesmo espazo coa exhibición de San Simón, de Miguel Ángel Delgado, ás 19.00 horas, seguida de ‘Antes de nós’, de Anxos Huerta, ás 21.00 horas.

TRASLADO Á DOMUS NAS ÚLTIMAS XORNADAS

O ciclo continuará o xoves 9 na Domus, onde se proxectará Deuses de pedra, de Iván Castiñeira, ás 19.00 horas, e Ao son da nova regueifa, de Manolo Maseda e Saúl Rivas, ás 21.00 horas.

Finalmente, o venres 10 pechará a programación con dúas novas sesións neste espazo: O silencio herdado, de Lucía Dapena González, ás 19.00 horas, e ‘360 curvas’, de Alejandro Gándara Porteiro e Ariadna Silva Fernández, ás 21.00 horas.

PROGRAMACIÓN COMPLETA

MARTES 7 DE ABRIL – TEATRO COLÓN
19.00 h – Sirât, de Oliver Laxe

21.00 h – As liñas descontinuas, de Anxos Fazáns
Presentación coa actriz Mara Sánchez.

MÉRCORES 8 DE ABRIL – TEATRO COLÓN
19.00 h – San Simón, de Miguel Ángel Delgado
Presentación co director Miguel Ángel Delgado e o actor protagonista Flako Estévez.

21.00 h – Antes de nós, de Ángeles Huerta
Presentación coa actriz Cris Iglesias.

XOVES 9 DE ABRIL – DOMUS
19.00 h – Deuses de pedra, de Iván Castiñeiras

21.00 h – Ao son da nova regueifa, de Manolo Maseda e Saúl Rivas
Presentación cos directores Manolo Maseda e Saúl Rivas e regueifeiros.

VENRES 10 DE ABRIL – DOMUS
19.00 h – O silencio herdado, de Lucía Dapena González
Presentación coa produtora Laura Doval.

21.00 h – 360 curvas, de Alejandro Gándara Porteiro e Ariadna Silva Fernández