Novo pleno celebrado esta mañá no Pazo de María Pita. A alcaldesa, Inés Rey, cunha voz magoada por motivos de saúde, arrincaba o pleno, tralos minutos de silencio en memoria das vítimas de violencia de xénero, lendo declaración institucional de apoio ao pobo xitano, con motivo da celebración do Día Internacional do Pobo Xitano celebrado o pasado mércores co recibimento no propio concello.
Proceso participativo para o Parque da Agra
Un dos puntos máis importantes da sesión está relacionada co Parque da Agra e a modificación puntual do PXOM co obxecto de ordenar o parque da Agra, polígono M22, para executar a Sentenza número 620/2015 e darlle efectividade ao convenio asinado entre o concello e Dricar de inversiones SL.
Pero moción non se votou, tralo acordo entre Goberno socialista e o Grupo Municipal do BNG para crear unha mesa específica de traballo para a tramitación da aprobación inicial da modificación puntual. Unha dita mesa de traballo facilitará a participación da veciñanza a través das entidades veciñais representativas da Agra do Orzán, co obxecto de compartir con eles o cambio na planificación urbana deste ámbito.
Os traballos levaranse a cabo durante o mes de abril para abordar a tramitación da aprobación inicial da modificación puntual do PXOM no Pleno ordinario do mes de maio. Así, co fin de facilitar a participación e de lle dar a maior a transparencia a un proxecto que permitirá a creación do novo Parque da Agra, o executivo pospón durante un mes a aprobación inicial da modificación do planeamento, co fin de darlle maior difusión e permitir a execución dun plan que acade o máximo consenso para transformar o barrio da Agra dotándoo dunha gran zona verde de uso público.
“Hoxe demostrouse que o voto do BNG é decisivo. O Goberno Local quita da orde do día un cambio do PXOM na Agra co que non estabamos de acordo nin no fondo nin na forma: pola falta de diálogo. A proposta do pleno de maio ten que ser distinta á que se pretendía aprobar hoxe”, apunta a edil do BNG Avia Veira tralo acordo.
Servizo de axuda no fogar
O Pleno aprobou definitivamente a Ordenanza municipal reguladora do servizo de axuda no fogar (SAF), tras a súa aprobación inicial na sesión do pasado 15 de xaneiro e unha vez rematado o trámite de información pública. No marco dese procedemento, o Grupo Municipal Popular presentou unha alegación, que foi rexistrada fóra de prazo e desestimada polo Pleno, que aprobou tamén de forma definitiva o novo texto da ordenanza.
Ademais, o pleno rexeitou, coas abstencións de PSOE e BNG, a adhesión do Concello á Asociación Internacional Culture Action Europe. Os dous grupos criticaron a xestión cultural do goberno socialista e non votaron a favor dunha moción que precisaba da maioría absoluta para corroborarse.
Máis novas
O parque da Agra é unha vergoña, non sei como se atreveron a abrilo así”
