A Universidade da Coruña (UDC) presentou o Quantum Lab do CITIC, un espazo científico estratéxico e interdisciplinar que está “chamado a converterse nun polo de referencia en computación cuántica aplicada en Galicia”. Así o explicou o reitor da UDC, Ricardo Cao, na presentación desta iniciativa no reitorado coruñés, na que estivo acompañado, entre outros, por un dos investigadores do CITIC e impulsores deste proxecto, Diego Andrade.
“O Quantum Lab do CITIC é unha infraestrutura clave para impulsar a investigación, a innovación e a transferencia tecnolóxica, contribuíndo ao desenvolvemento dun ecosistema avanzado ao redor das tecnoloxías cuánticas”, sinalou o reitor durante o acto institucional.
Pola súa banda, o investigador Diego Andrade destacou que o principal obxectivo que se persegue con esta nova instalación é “crear sinerxías entre os grupos de investigación”, así como obter financiamento para novas infraestruturas e lograr unha maior capacidade investigadora neste ámbito de vangarda. Isto, segundo engadiu o propio Andrade, permitirá ter un maior impacto na comunidade científica e, ao mesmo tempo, transferir os resultados da investigación ás empresas da contorna para potenciar o tecido económico.
