O Tribunal Superior de Xustiza de Galicia (TSXG) elevou a un ano e nove meses de prisión a condena a unha xestora por quedar diñeiro dunha comunidade de veciños en Culleredo. Inicialmente, fora condenada pola Audiencia Provincial como autora dun delito continuado de apropiación indebida a un ano de cárcere, pero agora o alto tribunal aumenta a pena atendendo ao recurso da Fiscalía, á vez que desestima o da procesada.

O Ministerio Público sostiña, e así se considerou probado, que a muller levou a administración da comunidade de propietarios desde xaneiro de 2015. Ademais, os residentes designárona tamén presidenta ao residir nunha vivenda do mesmo edificio.

“As súas funcións consistían en levar as contas da comunidade (xestión e manexo da conta bancaria) e ordenar gastos e pagos”. No entanto, a sentenza sinala que, “guiada polo ánimo de obter un beneficio patrimonial ilícito, realizou durante algún dos anos en que desempeñou a actividade de administración da comunidade, entre o ano 2015 ao 2017″, distintas retiradas de diñeiro.

Para ocultar as manobras, a xestora “fixo constar pagos que non se correspondían con cargo algún á conta da comunidade”, segundo argumentou o Ministerio Público. Deste xeito, quedou probado que incorporou ao seu patrimonio un total de 9.200 euros pertencentes aos fondos veciñais.