Unha colisión frontal rexistrada na pasada noite na AC-223, ao seu paso por Vizoño, no municipio de Abegondo, saldouse coa morte dun home de 41 anos (A.S.V.).

Ademais, a condutora do outro vehículo, unha muller de 55 anos (B.M.F.), foi trasladada ao Complexo Hospitalario Universitario da Coruña (Chuac).

Segundo informou o 061, o aviso do sinistro recibiuse este domingo pasadas as 22.30 horas na central de coordinación de Urxencias Sanitarias de Galicia.

Ata o punto enviáronse dúas ambulancias do 061, e tamén se desprazou persoal sanitario da PAC de Ordes.

Foron atendidos dous pacientes, o home que faleceu no punto do accidente e a muller evacuada ao centro hospitalario.

LIBERADO POLOS BOMBEIROS

O 112 concretou que o sinistro consistiu nunha colisión frontal entre dous turismos.

O vehículo que ocupaba o condutor falecido saíuse da vía e quedou envorcado. Tivo que ser liberado polos bombeiros de Ordes.