A alcaldesa da Coruña e presidenta da rede Atlantic Cities, Inés Rey, presidiu a Asemblea Xeral 2026 da organización xunto con Juan Mari Aburto, alcalde de Bilbao, cidade na que tivo lugar o encontro. No evento participaron representantes municipais de España, Portugal, Francia e Irlanda para abordar os principais retos e oportunidades do espazo atlántico europeo, segundo informou o goberno local.

Durante a apertura da asemblea, a rexedora herculina destacou que Bilbao constitúe “un exemplo de transformación urbana e de cooperación entre institucións e territorio”. Nese contexto, Inés Rey defendeu con firmeza o papel estratéxico das cidades na construción da futura Macrorrexión Atlántica.

Do mesmo xeito, a presidenta da entidade reivindicou unha maior participación e peso dos gobernos locais nos procesos de decisión europeos. “Somos a administración máis próxima á cidadanía e tamén quen transforma as estratexias europeas en políticas concretas”, sinalou a alcaldesa para poñer en valor o traballo do municipalismo no eixe atlántico.