A directora xeral de Mobilidade, Judit Fontenla, presentará o vindeiro luns aos alcaldes e ás persoas responsables da área de mobilidade dos concellos da Coruña, Arteixo, Cambre, Culleredo e Oleiros a proposta da Xunta para crear unha área de prestación conxunta do servizo de taxi na cidade herculina e na súa contorna.

Segundo trasladou o Goberno galego, esta iniciativa dá continuidade á proposta xa abordada na reunión da comisión de seguimento do convenio para a prestación do servizo de autotaxi no aeroporto de Alvedro, celebrada o pasado mes de abril.

A finalidade da medida é reorganizar a prestación do servizo nun ámbito supramunicipal co obxectivo de mellorar a eficiencia e a cobertura do taxi na comarca. Para iso, a Xunta propón implantar un sistema de licenzas compartidas que permita ás persoas titulares operar en todo este territorio baixo unhas mesmas condicións.

En concreto, o modelo previsto incluiría un réxime tarifario único, paradas comúns e quendas coordinadas entre os distintos concellos incluídos na área. Deste xeito, os taxis autorizados poderían prestar servizo nun espazo máis amplo que o do seu municipio de referencia, o que, segundo a Xunta, permitiría unha mellor resposta ás necesidades de mobilidade da poboación.

UN ÁMBITO CON 634 LICENZAS

A área proposta abranguería os concellos da Coruña, Arteixo, Cambre, Culleredo e Oleiros, que suman no seu conxunto case 381.000 habitantes. No que respecta ás licenzas, A Coruña conta actualmente con 519, Arteixo con 28, Cambre con 23, Culleredo con 34 e Oleiros con 30.

Coa posta en marcha da área de prestación conxunta, o servizo pasaría a reunir 634 licenzas de taxi nun mesmo ámbito territorial. A proposta será agora trasladada aos representantes municipais nun encontro no que Mobilidade explicará os detalles da iniciativa e o seu encaixe para a prestación do servizo nos cinco concellos.