Un home que, en agosto de 2024, encaixou ata en tres ocasiones o seu vehículo contra a terraza e a fachada dun bar do barrio coruñés dos Mallos, aceptou 14 anos e seis meses de prisión así como o pago dunha multa de 180 euros.
Foi no xuízo fixado para este martes na Audiencia Provicial da Coruña e tras un acordo entre o Ministerio Público, acusacións particulares e defensa en canto á responsabilidade penal ao recoñecer os feitos o procesado e pactarse unha rebaixa da condena. Segundo manifestou o letrado do procesado en declaracións aos medios de comunicación, a mesma inclúe a atenuante de reparación de parte do dano causado e outra de “anomalía psíquica”. “Ten varios trastornos mentais de longa evolución”, especificou.
Deste xeito, o Tribunal acordou dous anos de cárcere polo delito de condución temeraria “con manifesto desprezo pola vida dos demais”; dous anos e seis meses por cada un do cinco homicidios en grao de tentativa; e o pago dunha multa de 180 euros por lesións leves. En canto á execución de privación de liberdade, segundo concretou o maxistrado presidente, aplicarase un principio de cumprimento de penas que é o triplo da pena máis alta. Así, o xa condenado estará “un máximo de sete anos e medio no cárcere, contando o tempo ingresado en prisión provisional”.
RESPONSABILIDADE CIVIL
Para determinar a responsabilidade civil, isto é, a contía das indemnizacións polos danos morais causados aos afectados, o xuízo continuará este mércores. “En concreto, nós pedimos os danos do local que están cuantificados polos peritos xudiciais en 24.000 euros, os gastos derivados do cesamento de actividade e danos emerxentes a maiores”, detallou, en declaracións aos medios de comunicación, o avogado da dona do bar.
Neste sentido, a propietaria do local, quen tamén resultou ferida o incidente, declarou en Sala que o seu establecemento estivo pechado máis de dous meses. “Perdín toda a miña clientela da noite para a mañá, moita xente non vén porque ten medo de estar sentada alí“, asegurou.
FEITOS
Tal e como recolle o escrito fiscal, os feitos ocorreron preto da medianoite do 10 de agosto de 2024 na terraza do bar O Pinchiño. A agresión, concreta, fraguouse horas antes, cando no barrio viviuse un episodio de agresión entre unha parella, que terminou coa muller esposada e trasladada ao hospital. Noutro establecemento hostaleiro, o condenadp atopouse coa muller, que lle contou o sucedido e pediulle que a levara a casa.
Horas despois, ao fío da medianoite, o home atopábase estacionado fronte ao bar O Pinchiño, en cuxa terraza había unhas 15 persoas, cando a muller chegou e recriminoulle o sucedido á súa parella, que tamén se atopaba alí.
Nun momento dado, mentres vía a discusión entre ambos, o procesado decidiu intervir, e, “sendo consciente do risco que a manobra que ía realizar supuña para a pluralidade de persoas que se atopaban na terraza, entre elas unha en cadeira de rodas”, dirixiu o seu vehículo coas luces apagadas e a gran velocidade cara a eles, subiuse á beirarrúa e detívoo tras impactar contra un biombo que a delimitaba coa vía pública.
Posteriormente, deu marcha atrás e volveu impactar o vehículo cara ao lugar onde se atopaban os seus coñecidos, impactando sobre a súa mesa e provocando que caesen ao chan. A acción provocou outros dous feridos. Lonxe de cesar no seu empeño, o preso baixouse entón do coche e comezou a golpear á parella da muller, polo que tivo que ser separado por cinco clientes do bar.
Estas cinco persoas discutían co home reprochándolle o que fixera e atopábanse na terraza do establecemento unhas detrás doutras en fronte da porta de entrada cando el se introduciu de novo no seu coche e deu marcha atrás para acelerar de novo e dirixir o coche contra elas, levándose por diante as mesas e cadeiras da terraza.
