Renfe recupera este sábado a circulación ferroviaria na estación da Coruña, unha vez rematada a segunda fase das obras de Adif na infraestrutura. Estes traballos, iniciados o pasado 26 de xuño, obrigaran a interromper temporalmente o servizo ferroviario na terminal coruñesa durante dúas semanas, coincidindo co comezo da tempada estival.
Durante este período, a compañía habilitou un plan alternativo de transporte para garantir a continuidade dos servizos afectados de Media Distancia, Avant e Longa Distancia. En total, mobilizáronse máis de 1.850 autobuses e 285 taxis para cubrir as necesidades de desprazamento das persoas usuarias. Segundo trasladou Renfe, o dispositivo organizado durante estas dúas semanas desenvolveuse con normalidade, permitindo atender a elevada demanda de viaxes e cumprir coa programación prevista.
NOVA FASE ENTRE A CORUÑA E UXES
A partir deste sábado, Adif inicia unha nova fase de actuacións na infraestrutura entre A Coruña e Uxes, o que implicará restricións na circulación neste tramo. Por mor destas novas necesidades operativas, Renfe axustará o horario dun total de dez trens de Media Distancia, Avant e Longa Distancia. Entre os cambios previstos, o tren 9470 Avant Ourense-A Coruña sairá ás 6.30 horas, dez minutos antes do habitual, mentres que o 9480 Avant Ourense-A Coruña sairá ás 7.45 horas.
Tamén se modifican as saídas dos servizos de Media Distancia Vigo Urzaiz-A Coruña das 10.40, 13.45 e 14.35 horas, así como varios trens Avant entre A Coruña e Ourense. En concreto, o 9061 Avant A Coruña-Ourense sairá ás 6.00 horas, o 9351 Avant A Coruña-Ourense ás 15.08 horas e o 9111 Avant A Coruña-Ourense ás 10.00 horas. Ademais, o 9182 Media Distancia Vigo Urzaiz-A Coruña modifica a súa chegada ás 19.52 horas e o 4345 AVE Madrid-A Coruña chegará ás 18.21 horas.
RENFE RECOMENDA CONSULTAR OS HORARIOS ANTES DE VIAXAR
A compañía lembra que, neste contexto de obras, a evolución dos traballos podería requirir modificacións puntuais nos primeiros servizos do día 11 de xullo. Por iso, Renfe recomenda ás persoas viaxeiras consultar os horarios antes de desprazarse, incluídos os correspondentes ás paradas intermedias. A recuperación da circulación na estación da Coruña pon fin á principal interrupción do servizo, aínda que os traballos de Adif continuarán condicionando algúns horarios nos próximos días.
