A xunta de goberno local da Coruña deu luz verde á saída a licitación do servizo de axuda a domicilio, cun orzamento de 25.492.497,92 euros. Segundo informou o Concello nun comunicado, a licitación é para o próximos tres anos e con posibilidade de prórroga para outros dous. O total da licitación é para a contratación de seis lotes, correspondentes á división por zonas da prestación do servizo na cidade herculina.

A alcaldesa, Inés Rey, destacou que este é un servizo público “fundamental” de carácter social que ofrece apoios de carácter persoal, doméstico, psicosocial e socieducativo ás persoas ou unidades de convivencia no seu propio domicilio que, por limitacións na súa autonomía persoa, dependencia e outras circunstancias necesiten axuda para desenvolver actividades básicas.

Esta licitación, continuou a alcaldesa, ten como obxectivo “garantir a calidade, continuidade e blindar” esta “prestación esencial”. Na actualidade, este servizo presta asistencia personalizada e intensiva a máis de 1.100 persoas usuarias.

PLANTA DE NOSTIÁN

O Concello tamén acordou retomar o proceso de licitación da planta de tratamento de residuos de Nostián. Así, presenta como novidade a consideración e pago como rexeitamentos do 60% do material bioestabilizado.

O contrato combina a remodelación integral da planta e a explotación completa da instalación, dous puntos limpos e do vertedoiro clausurado. O obxectivo pasa por garantir unha xestión “moderna, eficiente e ambientalmente responsable dos residuos municipais”. Desta forma, a empresa adxudicataria farase cargo dos gastos de todas as  actuacións que se consideren necesarias para o mellor funcionamento do complexo.

A remodelación e modernización da planta tamén terá que contar cunha nova liña de tratamento, novas naves de compostaxe, ampliación da biometanización, melloras no tratamento do aire, EDAR e planta de gas.