As sesións inmersivas do documental ‘3CLIPSE’, que acolle o planetario da Casa das Ciencias da Coruña ata o 31 de agosto, achegan ao público ao tres eclipses solares que serán visibles desde a Península Ibérica en 2026, 2027 e 2028. Este será un dos fenómenos astronómicos máis extraordinarios das últimas décadas, que arrincará co do 12 de agosto.

Este museo coruñés conta con case 160 prazas diarias para gozar da proxección, estreada o 26 de xuño de forma simultánea a outros 35 centros de España e Portugal. O programa consta de dúas sesións: unha ás 13.00 horas (en castelán) e outra ás 19.00 (en galego) –os días 25 de xullo e 29 de agosto non se ofrecerá a sesión en castelán–.

A través da historia dunha nena e a súa avoa, o programa acompaña á audiencia nunha viaxe pola relación entre o ser humano e un dos fenómenos máis espectaculares do ceo. Convida a descubrir como se producen as eclipses, que significaron para distintas culturas ao longo da historia e por que seguen espertando fascinación en pleno século XXI, segundo anticipou o Concello.

“A nosa cidade vai ser un lugar privilexiado para presenciar esta histórica eclipse”, apuntou o concelleiro de Cultura e Turismo, Gonzalo Castro. Por iso, o goberno local aproveitou a ocasión para reforzar as accións educativas e divulgativas para facer do acontecemento “algo inesquecible”.

DETALLES DA PRODUCIÓN

‘3CLIPSE’ é un proxecto coordinado polo Museo Elder da Ciencia e a Tecnoloxía (Las Palmas de Gran Canaria) e coproducido polo Concello da Coruña a través dos Museos Científicos, coa colaboración da Fundación Española para a Ciencia e a Tecnoloxía (FECYT).

A cinta, dirixida por Fernando Jáuregui, conta coa participación do estudo de animación coruñés Antaruxa e os técnicos dos Museos Cientificos Bibiana García Visos (produción) e Marcos Pérez Maldonado (guión).