A ata agora deputada socialista no Congreso Obdulia Taboadela será nomeada nova subdelegada do Goberno na Coruña en substitución de Xullo Abalde. A substitución chegará tras a xubilación do exrector da Coruña, quen accedera ao cargo en setembro do pasado ano, e farase efectiva o vindeiro luns, 31 de agosto. Avanzouno a Delegación do Goberno, cuxo titular, Pedro Branco, manterá un encontro con Abalde e Taboadela o vindeiro luns na sede da institución na Coruña.
Obdulia Taboadela tomará posesión do cargo a mediados do mes de setembro, unha vez deixe o Congreso dos Deputados, onde é deputada pola provincia da Coruña desde o ano 2023. Pedro Branco agradeceu o compromiso mostrado por Xullo Abalde no seu paso pola Subdelegación, onde destacou que “impulsou a acción do Goberno de España na provincia, facilitando investimentos e consolidando eixos de colaboración permanentes co resto de administracións e organismos en beneficio da cidadanía”.
COÑECEMENTO DA PROVINCIA
Pola súa banda, o delegado do Goberno destacou da nova subdelegada a súa “experiencia e profundo coñecemento” da realidade da provincia da Coruña e das dinámicas do cargo. Tamén a animou a dar continuidade ao traballo que viña facendo Xullo Abalde, dándolle un novo impulso.
XA FOI SUBDELEGADA ENTRE 2004 E 2007
Obdulia Taboadela (Madrid, 1964) é doutora en Socioloxía, e profesora titular na Universidade da Coruña, sendo especialista en mercado de traballo, migracións internacionais e estudos de xénero. Ocupou previamente o cargo de subdelegada do Goberno na Coruña entre 2004 e 2007 e foi concelleira do Concello da Coruña e senadora.
