O Concello da Coruña abrirá este martes, 1 de setembro, o prazo de preinscrición para participar na nova programación de actividades socioculturais da rede de centros cívicos municipais, que se desenvolverá durante os últimos meses do ano.
A convocatoria abrangue o período comprendido entre setembro e decembro e incorpora máis de 5.100 prazas repartidas entre 345 grupos, cunha oferta destinada a persoas de diferentes idades e con actividades adaptadas a distintos perfís e intereses.
As persoas interesadas poderán realizar a preinscrición durante os días 1, 2 e 3 de setembro a través da páxina web municipal. Para facilitar o acceso ao procedemento, o Concello habilitará tamén atención telefónica para aquelas persoas que non dispoñan de conexión á Internet ou precisen axuda para completar o trámite.
Neste caso, o apoio prestarase a través do número 857 890 628, desde o que se ofrecerá asistencia para formalizar a solicitude dentro do prazo establecido.
A programación municipal distribúese en diferentes categorías segundo as persoas destinatarias. En concreto, haberá 40 grupos orientados á infancia, outros 27 destinados á mocidade, mentres que a maior parte da oferta terá carácter interxeracional, con 216 grupos abertos a participantes de diferentes idades.
A proposta complétase con 62 grupos específicos para persoas maiores, dentro dunha programación coa que o Concello pretende manter os centros cívicos como puntos de participación e actividade social nos distintos barrios da cidade.
A concelleira de Benestar Social, Participación e Igualdade, Nereida Canosa, animou a veciñanza a participar nesta nova convocatoria e destacou a función destes equipamentos municipais.
Segundo sinalou, a programación “converte os centros cívicos en espazos de encontro, aprendizaxe e convivencia nos barrios e que permite ofrecer alternativas adaptadas ás diferentes idades e intereses da cidadanía”.
