O Concello da Coruña levará ao pleno da próxima semana a anulación de dous acordos municipais adoptados en 1962 que facilitaron que a Casa Cornide acabara en mans da familia Franco, un trámite que forma parte do procedemento impulsado polo consistorio para recuperar o inmoble da Cidade Vella. A alcaldesa, Inés Rey, defendeu este xoves a iniciativa e cualificou de “ficticia” e “ilexítima” a poxa coa que a propiedade municipal acabou pasando primeiro ao empresario Pedro Barrié de la Maza e, pouco despois, a Carmen Polo, esposa do ditador Francisco Franco.

“Estamos dando pasos para anular ese agasallo”, afirmou a rexedora, quen lembrou que existe un percorrido administrativo previo á vía xudicial para reclamar a devolución do edificio. A corporación municipal abordará concretamente a nulidade de dous acordos plenarios de xullo e agosto de 1962 vinculados á venda do inmoble. O procedemento inclúe tamén a desestimación das alegacións presentadas por Francisco Franco Martínez-Bordiú, neto do ditador, contra a revisión de oficio iniciada polo Concello.

DE BARRIÉ A CARMEN POLO EN POUCOS DÍAS

A Casa Cornide chegara a mans do Concello en 1962 tras unha permuta coa Administración do Estado. Pouco despois, o goberno municipal acordou alleala mediante poxa pública. O inmoble foi adxudicado a Pedro Barrié de la Maza por 305.000 pesetas e poucos días máis tarde acabou en mans de Carmen Polo. A documentación histórica recolle que Barrié solicitou autorización para poder transmitirlle a propiedade, unha operación que o Concello autorizou.

A propia declaración da Casa Cornide como Ben de Interese Cultural recolle que o Concello decidiu en 1962 allear o edificio, adxudicándollo a Barrié, quen pouco despois llo vendeu a Carmen Polo. Para o goberno municipal actual, o procedemento empregado naquela época presenta irregularidades suficientes para intentar declarar nulos os acordos que sustentaron a operación. “Hai un percorrido administrativo para anular eses acordos”, insistiu Rey.

O OBXECTIVO: QUE VOLVA AO PATRIMONIO PÚBLICO

A anulación será un novo paso na estratexia municipal para conseguir que a Casa Cornide regrese ao patrimonio público, unha reclamación que o Concello vén impulsando nos últimos anos e que previsiblemente deberá continuar pola vía xudicial. O consistorio toma como referencia o proceso seguido co Pazo de Meirás, que finalmente regresou ao patrimonio do Estado tras anos de reclamacións e procedementos xudiciais.

A Casa Cornide, situada na Cidade Vella da Coruña, é un palacete do século XVIII considerado un exemplo destacado da arquitectura residencial da Ilustración en Galicia e está declarado Ben de Interese Cultural desde 2023. Co paso que chegará ao pleno da próxima semana, o Concello busca agora eliminar a base administrativa sobre a que se asentou a operación de 1962 antes de avanzar na reclamación xudicial da propiedade.