Inditex conseguiu a autorización da Xunta para a construción dun parque eólico no porto exterior da Coruña que se destinará ao autoconsumo para subministrar enerxía renovable ao complexo da multinacional téxtil, así como a outras empresas da dársena coruñesa.
Este parque no municipio de Arteixo, promovido por Inditex Renovables, terá unha potencia de case 20 megavatios, segundo consta na resolución da Consellería de Medio Ambiente publicada no Diario Oficial de Galicia este venres. O investimento total para a súa execución é de 21,7 millóns de euros, cun prazo estimado de obras dun ano.
O parque eólico situado na contorna do porto exterior de Punta Langosteira estará composto por tres aeroxeradores e a súa infraestrutura asociada, coa ampliación da subestación eléctrica transformadora e unha liña soterrada de alta tensión. O proxecto recibiu a declaración ambiental en decembro do ano pasado. Prevese unha produción neta de 52.368 MWh anuais, co que “contribuirá notablemente a reducir a emisión de gases de efecto invernadoiro”, sostén o Goberno galego nun comunicado.
Estas autorizacións administrativas previa e de construción outórganse independentemente das autorizacións, licenzas ou permisos de competencia municipal, provincial ou doutros condicionantes técnicos de organismos ou empresas de servizo público ou interese xeral afectados, necesarios para a realización das obras previstas no proxecto promovido por Inditex.
