O Concello da Coruña vén de lanzar unha campaña municipal para achegar a conversa sobre a saúde mental aos espazos de encontro da mocidade e combater os prexuízos que dificultan compartir o malestar arredor dela.

Segundo trasladou o Goberno municipal, este sábado a alcaldesa, Inés Rey, presentou a iniciativa, en colaboración con APEM –asociación que ten como principal obxectivo mellorar a calidade de vida das persoas con enfermidades mentais–, nun acto celebrado no Círculo de Artesáns con motivo do Día Mundial da Saúde Mental.

Durante a súa intervención, a rexedora destacou a importancia de escoitar as experiencias das persoas con problemas de saúde mental. “As persoas usuarias de APEM elixiron o que querían dicir e como querían dicilo. Ás institucións cómprenos escoitalas e axudar a que esas palabras cheguen a máis xente”, afirmou. Neste sentido, Rey tamén lle reclamou á Xunta un reforzo da atención psicolóxica e unha redución dos tempos de espera, asegurando que se debe garantir que as persoas poidan recibir axuda a tempo, “sen que dependa do que poidan pagar”.

Pola súa parte, a concelleira de Benestar Social, Participación e Igualdade, Nereida Canosa, explicou que a campaña busca chegar á mocidade nos seus espazos habituais de encontro, tamén a quen aínda non está a buscar información sobre saúde mental. “Temos que tomarnos en serio o que nos contan e facilitar que poidan falar antes de se sentiren desbordadas ou desbordados“, indicou, animando toda a mocidade a informarse e participar na campaña.

O Goberno municipal editará 40.000 pousavasos en oito modelos diferentes, con mensaxes escritas por persoas usuarias de APEM. Entre as frases seleccionadas figuran “Por fóra parece que todo vai ben. Por dentro, non sempre”, “Non compares a túa vida coas redes: ninguén publica os días malos” e “Non necesito que me xulguen, só que me escoiten”.

No reverso dos pousavasos explicarase a orixe dos textos coa frase “Estas palabras son de quen as viviu” e o lema “Falar axuda. Escoitar, tamén”. Os materiais incorporarán un código QR que permitirá acceder á información municipal sobre o Plan de Saúde Mental. Os pousavasos distribuiranse coa colaboración da Asociación Provincial de Empresarios de Hostalería.