O voceiro do goberno municipal da Coruña, o socialista José Manuel Lage, avanzou que nas próximas semanas convocarán o BNG para negociar os convenios nominativos con entidades da cidade, despois de que os nacionalistas expuxesen esta posibilidade malia non existir un acordo sobre os orzamentos para 2027. Tras denunciar incumprimentos nos orzamentos vixentes e nos acordos de investidura, o BNG non acudiu á reunión convocada para negociar as contas do vindeiro ano, como tampouco fixo o PP. Ante esta situación, o goberno local avanzou que en 2027 se prorrogarían os orzamentos actuais.

Porén, o BNG deixou no seu momento a porta aberta a negociar os convenios con entidades, cuestión sobre a que Lage anunciou que se convocará os nacionalistas a unha reunión. Do mesmo xeito, segundo indicou, abordarase co BNG o novo plan urbanístico das Xubias. Así o manifestou ao informar das medidas aprobadas na Xunta de Goberno Local. Nela, acordouse encomendarlle á Empresa Municipal de Vivenda a xestión da piscina municipal cuberta climatizada de San Amaro e adxudicar por máis de 654.000 euros as obras da segunda fase da remodelación dos vestiarios da Cidade Deportiva da Torre. Así mesmo, deuse o visto e prace á ampliación do contrato do servizo de conserxaría nos edificios deportivos municipais, co obxectivo de aumentar o número total de horas.