O Tribunal Superior de Xustiza de Galicia (TSXG) absolveu unha médica do complexo hospitalario universitario da Coruña (Chuac) tras unha primeira condena por parte da Audiencia da Coruña por acceso ao historial clínico dunha compañeira.

A Sección Segunda da Audiencia coruñesa considerou probado este extremo. Con todo, o alto tribunal galego estima os recursos de apelación interpostos polo Ministerio Fiscal e pola médica contra esta sentenza, e revócaa no sentido de absolver a apelante. Entre outras cuestións, ten en conta os testemuños de responsables de sistemas informáticos do complexo hospitalario, que subliñaron que non se podía saber se accedera a algún dato nin, de ser o caso, a cal, aspecto sobre o que un deles indicou que, se se abrira un documento, constaría.

Pola contra, a Audiencia da Coruña inhabilitouna durante seis anos ao considerar que accedera sen autorización ao historial clínico dunha compañeira por ter unha mala relación con ela.  Tamén foi condenada a tres anos e medio de cárcere, aínda que coa proposta de indulto parcial da pena. Entre outros argumentos, nos recursos presentados expúxose un “erro na valoración da proba”, aspecto que, entre outros, se ten en conta para a súa absolución.