O presidente da Xunta, Alfonso Rueda, mantivo unha conversa co cirurxián coruñés Diego González Rivas no cuarto episodio do seu podcast Galicia Calidade, que se estreará este domingo.

Segundo avanzou a Xunta nunha nota de prensa, na entrevista abordaron cuestións como a creación da súa técnica minimamente invasiva, coñecida como Uniportal VATS, que levou a preto de 150 países do mundo a través das súas formacións e das operacións que realiza.

De feito, o propio González Rivas confirmou que esta técnica foi empregada recentemente na operación de pulmón do papa León XIV. Así mesmo, durante a conversa trataron outros temas como a vocación necesaria para ser un bo médico; o futuro da medicina, e as fortalezas e eivas do sistema sanitario público.

PODCAST DO PRESIDENTE 

No que atinxe ao podcast do presidente, o proxecto consiste nunha entrevista mensual a referentes da sociedade galega en distintos ámbitos como a ciencia, a medicina, o deporte, a cultura ou a empresa. Pretende chamar a atención sobre o talento e o potencial da comunidade –a “Galicia Calidade”– e poñer en valor os logros dunha comunidade competitiva, innovadora e inclusiva.

Anteriormente foron entrevistados o pediatra Federico Martinón, a triatleta e campioa paralímpica Susana Rodríguez Gacio, e o xornalista Álex Fidalgo. O podcast pode seguirse na canle de YouTube da Xunta e tamén se difundirá a través das redes sociais do titular do Executivo autonómico.