A CIG, no marco da campaña en demanda de atención presencial e por unha atención á cidadanía “de calidade e sen discriminación”, xunto co colectivo de persoas xubiladas e pensionistas da central, concentrouse nesta xornada na Coruña ante a Delegación do Goberno.

Na protesta denunciouse que “coa escusa da transformación dixital e a cita previa, a parte máis vulnerable da cidadanía está a ser expulsada sen pudor das nosas administracións e servizos públicos”.

O secretario nacional de CIG-Administración, Luís Carballo, subliñou que o avance nas tecnoloxías non pode implicar que haxa unha discriminación na atención á cidadanía.

“Entendemos que o futuro da administración será pola vía telemática e dixital pero non se pode desatender a demanda dunha grande parte da sociedade porque non teña os medios ou a formación adecuada”.