A Sala Garufa acollerá o vindeiro 16 de maio a presentación do festival Vibra Balboa, un encontro musical impulsado en 2012 polos integrantes do grupo de música coruñés Chotokoeu.

A organización explica que para presentar a que será a 6ª edición, levarán a cabo unha festa coincidindo coa véspera do Día das Letras Galegas, nunha noite de folk e música tradicional, “propostas pouco habituais nas salas de música coruñesas e que reivindican o seu espazo na escena musical e cultural da cidade”.

A partir das 22:00 horas actuarán De Ninghures, un dos grupos referentes do “novo folk galego” e Covagueira, grupo nacido na famosa Escola de Gaitas de Ortigueira cunha proposta de folk instrumental. Ademais, haberá varios momentos para a “foliada” coas agrupacións Os do Xalo e Pandeireperras, que aseguran unha noite chea de bailes e festa, nunha das emblemáticas salas de música da Coruña.