Trala concentración deste luns, a Coruña volve ter outra oportunidade de berrar contra os abusos das mulleres e a cultura da violación este venres 1 de setembro. O colectivo Libres e Combativas convoca ás 19h unha nova Concentración Feminista en Obelisco.

“Ante a gravidade do ataque machista ao que estamos a asistir nos últimos días desde o ámbito do fútbol profesional, ante a xustificación da violencia machista que Luís Rubiales detallou no seu discurso durante a asemblea da federación española de fútbol, e ante a impunidade de que gozan os agresores, desde Libres e Combativas convocamos unha xornada estatal de mobilizacións para o vindeiro venres ás 19 h, que no caso da Galiza será na Coruña.
Desde Libres e Combativas chamamos a tódalas mulleres, a tódolos nosos compañeiros que loitan ao noso lado e a toda a mocidade a encher as rúas este 1 de setembro. Unha mobilización na que esixiremos que o goberno destitúa de xeito fulminante a Rubiales e aos adestradores das seleccións femininas e masculinas de fútbol, e abra unha investigación penal que chegue ata as últimas consecuencias respecto de tódalas denuncias de machismo, agresións sexuais e malos tratos, así como das gravísimas corruptelas económicas que enriqueceron a estes mafiosos”.