A Comisión de Festas de Santa Cruz tachou de “decepcionantes” as últimas declaracións do alcalde de Oleiros, Anxo García Seonae, declarado abertamente comunista e admirador do Ché Guevara, nas que apuntaba a intereses partidistas tras as críticas da organización tras as dúas pelexas multitudinarias ocorridas durante os festexos a finais de agosto.
“Unha semana despois de ter que adiantar o horario de finalización das festas polo motivo que todos saben, o Concello de Oleiros segue sen interesarse pola nosa situación. Estamos tremendamente decepcionados coa actitude do Concello, que en ningún momento durante esta semana fixo ademán de conversar connosco para a procura de solucións e a depuración de responsabilidades”, lamentaron.
Respecto das declaracións do alcalde, Anxo García Seoane, consideran que busca “xerar polémicas innecesarias e desviar a atención nos medios“. “Tentar culpar do ocorrido a un evento como o Xacobebo que nada tivo que ver cos lamentables acontecementos das noites do venres 18 e martes 22 de agosto parécenos incorrecto”, aseguran.
Sobre isto, lembran que o alcalde “rogou” na reunión previa ás festas que o Xacobeo non aparecese no cartel. “Atacar directamente a un membro da directiva da Comisión de Festas que regala o seu tempo e as súas vacacións en traballar gratuitamente para o seu pobo, e despois borrar esa parte dun comunicado nas redes sociais e páxina web municipal, é inadmisible”, insisten.
AUSENCIA DE EFECTIVOS POLICIAIS
Sobre a ausencia de efectivos policiais nas noites das festas, non queren “entrar a discutir” o declarado polo alcalde. “Todos os veciños de Santa Cruz e doutras parroquias e concellos veciños que asistiron ao evento puideron comprobar as cifras das que falamos. Resúltanos ridículo entrar en máis discusións sobre isto, cando resulta evidente para todos os asistentes que se cometeron erros por parte de corporación municipal”, sinalan.
A este respecto, lamentan que nin no comunicado oficial do Concello de Oleiros nin en declaracións posteriores aos medios, non se mencionou “a falta de cooperación na procesión de subida do Ramo a Igrexa de Liáns cunhas 300 persoas pola estrada sen seguridade, a falta de supervisión de puntos críticos, a falta de medios para controlar os espazos restrinxidos para o espectáculo pirotécnico ou os desafortunados berros proferidos polo alcalde a un membro da comisión”.
