O Concello da Coruña obtivo unha subvención para a creación dun centro de capacitación dixital municipal. A liña de axudas, convocada o pasado 24 de abril polo Ministerio de Educación e Formación Profesional, ten como obxectivo a creación dunha rede estatal de centros de capacitación dixital en entidades locais.

No marco do plan de recuperación, transformación e resiliencia, financiado pola Unión Europea a través dos fondos Next Generation, convocáronse un total de 510 axudas para entidades locais de toda España. O Concello da Coruña foi unha das oito entidades galegas á que lle foi concedida esta axuda, sendo a única cidade, xunto con Vigo, en obter os fondos para a creación do centro. Coa concesión desta axuda, A Coruña pasa a formar parte da rede estatal de centros de capacitación dixital que teñen como meta facilitar o acceso á formación neste ámbito.