A Coruña acollerá os días 7, 8 e 9 de abril o Galicia Fórum Gastronómico, un “punto de encontro” de profesionais da gastronomía que ten como obxectivo “potenciar” os produtos e a cociña galega coa “despensa do Atlántico” como eixo temático.
Nun comunicado, a organización informou de que a cita será nun “gran espazo feiral” no que participarán “as mellores empresas do sector foodservice”. “O período de comercialización xa está aberto para que todos aqueles que desexen gañar visibilidade, captar novos clientes ou acelerar o seu proceso de vendas, poidan reservar a súa caseta”, engade.
O evento contará cun programa de actividades no que se poderán ver en directo aos cociñeiros e cociñeiras “máis prestixiosos do panorama actual xunto a futuras promesas da cociña”. O tema central desta edición será a “despensa do Atlántico”, segundo destaca a organización.
Ademais, remarca que Galicia Fórum Gastronómico persegue xerar “negocio” para as empresas participantes e contribuír a “situar Galicia e A Coruña como destinos gastronómicos de primeiro nivel”.
