Non damos feito coa cantidade de actividades que artella a Asociación Cultural Alexandre Bóveda. A entidade arrinca este luns 16 de outubro o ciclo PENSANDO O FUTURO, no que traerán ao seu local na Rúa Santo André, 36, 1º, cinco voces que queren ofrecer un xeito diferente de contar o mundo. Falarán de como se constrúe a historia, de medios de comunicación públicos, de censura e autocensura, de feminismo e de intelixencia artificial.
A primeira cita será ás 19.00 h con Francisco Calo Lourido, Doutor en Xeografía e Historia pola USX e Catedrático de Xeografía e Historia, e gañador en dúas ocasións o premio de investigación Antón Losada Diéguez. Calo Lourido ofrecerá a palestra A Historia de España, unha construción interesada e falaz.
“Todas as nacións falsearon a súa Historia”, explica Calo. “España non existiu como ente político, como Estado, ata o século XVIII, e esforzouse por aparentar algo que aínda hoxe segue a ser a súa maior teima: o sacrosanto concepto da unidade nacional”.
Cinco charlas
Teremos dúas palestras en outubro e tres en novembro nesta edición:
- Francisco Calo Lourido (16 de outubro)
- Anxo Quintela (23 de outubro)
- Elvira Souto (6 de novembro)
- Carme Adán (13 de novembro)
- Rubén Cela (27 de novembro)
Inscricións: acab@mundo-r.com
