A alcaldesa da Coruña, Inés Rey, visitou hoxe o polígono de Agrela, onde xa se completaron os traballos de humanización promovidos polo Concello na rúa Severo Ochoa, unha das principais arterias de circulación do parque empresarial.
As obras supuxeron un investimento de 833.720,53 euros, partida orzamentaria cofinanciada nun 80% con fondos FEDER ao amparo da estratexia de rexeneración urbana EidusCoruña.
O obxectivo xeral da intervención foi a mellora ambiental de toda a zona, a través de diversas accións orientadas á creación de espazos verdes e a mellora da mobilidade.
“Renováronse o firme e as beirarrúas, mellorouse a accesibilidade ás paradas de autobús existentes, creáronse novas áreas verdes e plantouse arboredo na medianeira central da rúa”, explicou Inés Rey.
PREMIO
Noutra orde de cousas, segundo informa o consistorio, a Policía Local da Coruña resultou gañadora do Premio ás Boas Prácticas en Educación Viaria no VIII Premios Nacionais de Seguridade e Educación Viaria para as Policías Locais.
A concelleira de Seguridade Cidadá, Montserrat Paz, recibirá o galardón este martes, 24 de outubro, nunha cerimonia que terá lugar en Madrid na Convención Nacional sobre Seguridade Viaria das Policías Locais.
