A Dirección Xeral de Emerxencias e Interior da Xunta elevou ao nivel laranxa a alerta por temporal costeiro, a partir das 18,00 horas da tarde, para as provincias da Coruña e Pontevedra.

Segundo a Axencia Estatal de Meteoroloxía (Aemet), prevense ventos do oeste ou suroeste de forza 7, que poderán chegar a ser de forza 8 entre Cabo Ortegal e Estaca de Bares. Ademais, espérase mar combinado do oeste ou noroeste, con ondas de ata sete metros.

No resto do litoral galego, a alerta será de nivel amarelo con refachos do suroeste de forza sete e ondas de ata cinco metros.

Por este motivo, a Xunta, a través do 112 Galicia, informou da situación aos concellos das provincias afectadas, a deputacións, servizos provinciais, agrupacións de Protección Civil e clubs náuticos.

Neste contexto, o Goberno galego lembra a importancia de manterse afastado da liña de costa, é dicir, de diques, rompientes e paseos marítimos. Tamén recomenda extremar as medidas de seguridade á hora de realizar calquera actividade no mar e revisar os cabos e amarres das embarcacións.

En canto ás precipitacións, a nosa zona segue en alerta amarela.