O pleno da Coruña aprobou a creación da sociedade pública que xestionará a Cidade das TIC, co apoio de todos os grupos con representación na corporación municipal.

Tamén se aprobou, sen votos en contra, o modificativo de crédito que permitía a achega municipal de 336.000 euros ao órgano xestor compartido coa Universidade da Coruña (UDC), o 51% do capital correspondente.

O portavoz do goberno local anunciou, así mesmo, que a alcaldesa xa asinou o convenio co Ministerio de Transportes que permitirá a transferencia de nove millóns de euros para o financiamento da estación intermodal.

Noutra orde de cousas, aprobouse, de forma definitiva e por unanimidade, o estudo de detalle para a ampliación de dez novos volumes edificatorios na parcela da empresa Showa Denko no polígono de Agrela.

Ademais, o pleno municipal aprobou a actualización de 29 ordenanzas fiscais municipais de face ao exercicio 2024. Segundo o goberno local, as tarifas recollidas en gran parte das ordenanzas non foran actualizadas, na maioría dos casos, desde o ano 2013, con algunha que non varía desde 2009.