O catedrático e candidato de Nova Luce, Ricardo Cao, será o novo reitor da Universidade da Coruña (UDC) tras un proceso electoral celebrado este luns e no que se impuxo ao outro candidato, Fermín Navarrina.
Nunha comparecencia ante os medios tras coñecerse o resultado, trasladou os seus agradecementos ás distintas persoas que lle acompañaron neste proceso, ademais de desexar sorte a Navarrina.
Tamén manifestou que o seu obxectivo será “facer a mellor universidade posible”. “Feita por e para as persoas”, sentenciou Cao, que será novo reitor da UDC por seis anos, período que a nova Lei de Universidades (LOSU) establece para os mandatos.
A substitución xeracional, a internacionalización ou a procura de maior financiamento serán, segundo expuxo na presentación da súa candidatura, obxectivos do seu mandato.
XORNADA
A súa elección tivo lugar nunha xornada con voto electrónico desde as 10,00 horas ata as 19,00 horas e na que estiveron chamados a participar 18.770 persoas, entre o profesorado, estudiantado e persoal de Administración e Servizos.
O novo reitor, que substituirá no cargo a Julio Abalde — tamén de Nova Luce, e á fronte do reitorado coruñés desde fai oito anos– conseguiu 2.983 votos fronte aos 1.590 de Navarrina, máis dun 65% de apoio en comparación co seu competidor, que foi algo superior ao 34 por cento.
No caso das eleccións a reitor na UDC en 2019, a participación oscilou entre 87 e o 18% en función das distintas categorías, sendo o máis baixo entre o estudiantado, como ocorreu tamén este ano.
