O PSOE provincial da Coruña proporá á letrada maior do Consello de Contas Patricia Iglesias, que é independente, e ao exreitor da Universidade da Coruña, Xulio Abalde, para ocupar os postos número uno e dous da candidatura ás eleccións autonómicas.

A proposta foi aprobada na tarde deste luns pola executiva provincial do PSOE da Coruña e inclúe como número tres á coruñesa Silvia Longueira, quen actualmente dirixe a Fundación Luís Seoane e é próxima á alcaldesa da Coruña, Inés Rey.

Segundo confirmaron fontes socialistas, no número catro incorpórase o secretario xeral do PSOE compostelán Aitor Bouza, mentres que no número cinco irá a que foi concelleira das Pontes e deputada no Congreso, Montserrat García Chavarría.

O militante de camariñas e deputado provincial Fabián Canosa Pasantes ocupará o posto número seis da lista, mentres que o sete será para a socialista de Boiro María Outeiral. Completan a proposta Manuel Santiago Pérez, de Ferrol, no número oito; a que foi presidenta de Fademur, Rosa Arcos, irá no nove; e Enrique Astray, de Frades, no dez.

A lista pola Coruña suporá unha renovación do 100 por cen dos deputados socialistas por esta provincia e deixa fóra á que foi viceportavoz parlamentaria na última etapa da lexislatura, Begoña Rodríguez Rumbo, quen é afín ao secretario xeral do PSdeG, Valentín González Formoso.

Pola Coruña foron deputados nestas lexislaturas socialistas como Pablo Arangüena, Martín Seco, e Noa Díaz, todos eles próximos ao exsecretario xeral do PSdeG Gonzalo Caballero, e de quen xa se daba por feito que non repetirían nas candidaturas.