Co simbolismo de chegar un día antes do 8 de marzo, chegou ao porto da Coruña, a primeira estadounidense en completar en solitario a volta ao mundo a vela. No marco da proba internacional Global Solo Challenge, cuio campión, o francés Phillipe Delamare, chegaba a pasada semana, Cole Brauer completaba co seu barco, o ‘First Light’, un percorrido de 26.000 millas náuticas en 130 días.

Saía o 28 de outubro de 2023 e chegaba esta mañá do 7 de marzo ao porto coruñés, “converténdose nun simbolo para todas as mulleres navegantes do mundo”, comentaba a propia protagonista que foi recibida por Maite Rojo, a ultrafondista e navegante malpicá, convidada pola organización

Tamén un grupo de familiares e varios medios estadounidenses déronse cita no porto coruñés para encontrarse con ela, pero ela tiña claro o que necesitaba: “Cun capuccino e un croissant xa serei invencible”, bromeaba aínda dende proa. A norteamericana destacou o feito de chegar a porto un día antes do Día da Muller Traballadora e ser a primeira estadonidense en facelo, un xesto co que quixo reivindicar o feito de que unha muller puidera rematar esta xesta en solitario.

Cole Brauer é a segunda desta esixente proba de navegación consistente en dar a volta ao mundo a vela. Unha proba cun gran prestixio internacional e que ten o seu final no porto da Coruña.

Máis novas

Esta é a historia de Philippe Delamare, o navegante que deu a volta ao mundo en menos de cinco meses